Storkontrakt i Frankrike for Vestnes Ocean: - Vi er kjempeglade!
Vestnes Ocean er ei godt forankra Florø-bedrift som har stor suksess med si internasjonale satsing. Dei er etablert i Tyrkia, Polen, India, Singapore og Frankrike, og har no vunne ei storkontrakt i nettopp Frankrike som sikrar dei arbeid heilt fram til 2026.
«Dette er ei veldig spennande og viktig kontrakt for oss. Det er ein beintøff konkurranse der ute, og det at vi er sikra arbeid til 2026 er lenge i denne bransjen. Alle tilsette i Vestnes er kjempeglade!», fortel Philippe Charbaut i Vestnes France.
Philippe Charbaut, Business development, Vestnes France
Oser av luksus
Det er luksushotellkjeda Ritz Carlton er oppdragsgjevaren til den nye kontrakta. Med hjelp av Vestnes skal hotellkjeda bygge 4 cruiseskip som oser av luksus. Kvart skip har plass til 1000 passasjerar og 1000 tilsette, så her blir det lagt til rette for at gjestene blir godt ivaretatt. På sommaren vil skipa segle i Middelhavet, og på vinterstid er det Karibia som er destinasjonen.
Kontrakta Vestnes no har sikra seg inneber at dei skal utruste og innreie alle mannskapsrom på dei fire cruiseskipa i tillegg til styrehuset.
«Vanlegvis har mannskapsrom litt lågare kvalitet enn områda vanlege passasjerar ferdast i. Ritz Carlton vil ha det beste av det beste også på mannskapsromma, så vi i Vestnes skal levere skreddarsydde løysingar av ypparste kvalitet», forklarar Charbaut entusiastisk.
- Gode nyheiter for Florø
Dei 4 cruiseskipa skal byggast i Saint-Nazaire utanfor Nantes i Frankrike. Philippe Charbaut kjem frå Nantes, og opplever store fordelar med det: «God kommunikasjon står heilt sentralt for å få ei slik kontrakt. Det er ein stor fordel for oss at vi forstår kulturen og kan kommunisere med verftet på fransk».
Vestnes Ocean har jobba med den franske marknaden sidan 2017. Det meste av jobben kjem til å gå igjennom dotterselskapet Vestnes France grunnar reglar i Frankrike. Philippe Charbaut fortel at kollegaene i Florø også kjem til å ha ei rolle: «Vestnes Ocean i Florø vil fungere som ein underleverandør på denne jobben, så kontrakta er gode nyheiter både i Saint-Nazaire og i Florø».
Scorar høgt
Kvar gong Vestnes er ferdig med eit oppdrag får dei ein grundig evaluering frå kunden.
«Det er gledeleg at Vestnes scorar høgt i evalueringa frå kundane våre. Dei set pris på at produkta er av høg kvalitet og at vi er gode på timing. Vi har eit velfungerande team som står heilt sentralt for å kunne levere så gode resultat», fortel ein nøgd dagleg leiar Jonny Bjørnset.
Dagleg leiar Jonny Bjørnset er glad for at Vestnes no er sikra arbeid heilt fram til 2026.
